Hüseyn ibn Əli — İslam peyğəmbəri Məhəmmədin nəvəsi, Əli ibn Talibin oğludur. Şiə İslamın üçüncü imamı və beşinci məsumudur. İslam dövlətinin Əməvi imperiyasına çevrilməməsi üçün mübarizə etmiş, lakin Əməvilər tərəfindən Kərbəlada şəhid edilmişdir.
Ağlamayın, göz yaşı tökməyin, mənim getməyimlə sizin dərd və müsibətləriniz qurtarmayacaq. Bu, sizin narahatçılıq və qəm-kədərinizin başlanğıcıdır. Özünüzü möhkəm saxlayın və bilin ki, Allah sizi qoruyur. Məndən sonra düşmənin qarşısına çıxdığınız zaman sizin dəyərinizi azaldan sözlər danışmayın.
Allah qorxusundan ağlamaq, cəhənnəm atəşindən xilas olmağa səbəb olar.
Allaha qul olanlar, başqasına qul olmazlar.
Allaha üsyan edərək bir şeyə çatmaq istəyən kimsə ümid etdiyindən uzaqlaşaraq, qorxduğu şeyə yaxınlaşmaqdadır.
Allahdan başqa heç bir yardımçısı olmayan kimsəyə zülm etməkdən çəkin.
Alimin nişanələrindən biri də öz sözünü tənqid etməsi və müxtəlif görüşlərin həqiqətindən xəbərdar olmasıdır.
Bəziləri Allahdan bir şey ümid edərək ibadət edərlər; bu tacirlərin ibadətidir. Bəziləri də qorxaraq ibadət edərlər; bu da kölələrin ibadətidir. Bəziləri isə Allaha şükr olaraq ibadət edərlər; bu da azad insanların ibadətidir; bax ən fəzilətli ibadət də məhz budur.
Xalq dünyaya bağlıdır və dinləri dillərindədir. Dinin onlara zərər yetirmədiyi vaxta qədər onun ətrafında dolanırlar. İmtahan vaxtı gəldikdə isə həqiqi dindarlar azalırlar.
