Azərbaycan atalar sözləri/Z

←Y

Azərbaycan atalar sözləri Müəllif: Şifahi xalq ədəbiyyatı

A→

Həmçinin baxın: Haqqında • < Mündəricat

• Zahiri gözəl - batini çirkin.
• Zahiri gözəllik müvəqqətidir.
• Zalıma Allah bəla verər.
• Zalıma rəhm etmək, məzluma zülm etməkdir.
• Zalımın çörəyi dizi üstə olar.
• Zalımın qılıncından kasıbın ahı pisdir.
• Zalımın ömrü az olar.
• Zalımın zülmü yadında qalmaz.
• Zaman axıb gedir, amma hər işini qurtarıb getmir.
• Zaman bir nəhrdir axar, durmaz.
• Zaman ilə hesablaşmaq gərək.
• Zaman gedərkən uymaq gərək
• Zaman keçər, söz qalar.
• Zaman pul deyil, onu qaytarmaq olmaz.
• Zaman səbrlidir.
• Zaman sənə saz olmasa, sən zamana saz ol.
• Zaman zamana uymaz.
• Zamana ilə düzəlişən həmişə rahatdır.
• Zamanaya bax, arıya qaval çaldırır.
• Zatı qırıqdır.
• Zatına da, südünə də bələdəm.
• Zəhər gələndə acı qaçar.
• Zəhər zəhəri öldürər.
• Zəhmət batmaz.
• Zəhmət çəkən ac qalmaz.
• Zəhmət çəkən bal yeyər.
• Zəhmət çəkən ləzzət aparar.
• Zəhmət çəkən peşman olmaz.
• Zəhmət çəkməyən bal yeməz.
• Zəhmət çəkməyən rahatlığın qədrini bilməz.
• Zəhmət hədər getməz.
• Zəhmət itməz.
• Zəhmət olan yerdə qeybət olmaz.
• Zəhmət - torpaqda, nemət - süfrədə.
• Zəhmət yemək istəmir, amma özü yedirdir.
• Zəhmətdən qaçan əl açar.
• Zəhməti bülbül çəkər, gülü qucar yenə xar.
• Zəhməti meşşatə çəkər, ləzzəti damad aparar.
• Zəhməti sevən işdən doymaz.
• Zəhmətin barı, torpağın varıdır.
• Zəhmətin ətri tərdir.
• Zəhmətlə yeyilən acı soğan, minnətlə yeyilən baldan şirindir.
• Zəhmətsiz bal yeməzlər.
• Zəhmətsiz iş olmaz.
• Zəhmətsiz rəhmət olmaz.
• Zəlzələni görən yanğına razı olar.
• Zəmanə dəyişdikcə, adamlar da dəyişir.
• Zəmanə ilə hesablaşmaq gərəkdir.
• Zəmanə insanın müəllimidir.
• Zəmanəyə uymaq gərək.
• Zəncir aslan üçündür.
• Zər deyəni zor deməz.
• Zər ilə olan zor ilə olmaz.
• Zər qədrini zərgər bilər.
• Zər olan yerdə zərgər də olar.
• Zərbə həmişə ağrıyan yerə dəyər.
• Zərər çəkəndə dönmək
• Zərər çəkəndə dönmək yarıdan da olsa qazancdır
• Zərər zəhərdən acı olar.
• Zərərdən qorxan dükan açmaz.
• Zərərdən qorxan xeyir görməz.
• Zərərin bir başı var.
• Zərərin yarısından qayıtmaq özü də mənfəətdir.
• Zərgər dükanının tozu da qızıl olar.
• Zəri də var, zoru da.
• Zərlə gözəllik almaq olmaz.
• Zərrə qədər iman, dünya qədər günah.
• Zərrəcə eşqi olanın dəryaca tabı gərək.
• Zərurət insana hər şeyi öyrədər.
• Zimistan çəkməyən bülbül baharın qədrini bilməz.
• Zindan olub altda qalmaqdansa, çəkic ol, üstdə ol.
• Zindana səbr eləyən axırı taxta çıxar.
• Zirək quş dimdiyindən tələyə düşər.
• Zirəklik comərdlik gətirər.
• Zirəni Kirmana aparmazlar.
• Ziyan ağudan acıdır.
• Ziyanın yarısından qayıtmaq da qazancdır.
• Ziyankardan qəza əskik olmaz.
• Ziyarətə gələn düşməndən heyif almazlar
• Zoğal dərənimiz də var, səbət hörənimiz də.
• Zor ilə gözəllik olmaz.
• Zor qapıdan gələndə haqq bacadan qaçar.
• Zora dağlar dayanmaz.
• Zorla gedən köpək qoyuna fayda verməz.
• Zurnaçı zorun üzünə verər.
• Zülm ilə abad olan bir gün gəlir bərbad olur.
• Zülm yerdə qalmaz.
• Zülmət daşıdır, götürən də peşmandır, qoyan da.
• Zülmlə yaşamaq cahil yeməyin yeməkdən yaxşıdır.
• Zülmün axırı olmaz.
• Zimistan görməyən bülbül, baharın qədrini bilməz.

Mənbə

• Atalar sözləri, Bakı,2004