Azərbaycan atalar sözləri/Söz, söhbət və danışıq

Azərbaycan atalar sözləri Müəllif: Şifahi xalq ədəbiyyatı

Həmçinin baxın: Haqqında • < Mündəricat

• Abır istəsən çox demə, sağlıq istəsən çox yemə.
• Ağzının qaytanı yoxdur.
• Adam var gözdən qızar, Adam var sözdən qızar.
• Adam odur ilqarından dönməyə.
• Adam yıxıldığı yerdən qalxar.
• Adın nədir? - Rəşid! Birin de, birin eşit!
• Adamın üzünə baxarlar, halını xəbər alarlar.
• Ara sözü ev yıxar.
• Başa dil gətirəni, el gətirə bilməz!
• Bildiyindən danış, bilmədiyin səni güdaza verər.
• Bir qəlbi ki, tikə bilmirsən, niyə yıxırsan?
• Bir dəli quyuya bir daş atdı, on ağıllı gəldi, çıxara bilmədi.
• Bir doğru ki, yalana oxşadı, onu deməzlər.
• Bir misqal dilini qoyub, bir batman başı ilə danışır.
• Bol çörəyin yoxdur, şirin dilin olsun barı.
• Qorxu adama yalan dedirdər.
• Damara bax, qan al.
• Danışana macal vermir.
• Danışıq, dananı qurda verər.
• Danışığını yeyəsən.
• Danışmaq gümüş, danışmamaq qızıldır.
• Danışıram - pis olur, Danışmıram - his olur.
• Dedim bir ağız ağla, demədim eli güldür bizə.
• Dedim eşidəsən, demədim öyrənəsən!
• Deyə-deyə dilimdə tük bitdi.
• Deyən ağılsız olsa, dinləyən ağıllı gərək.
• Dilim-dilim olasan, dilim!
• Dilini saxlayan salamat olar.
• Dil yalançı olunca, lal olsa yaxşıdır.
• Dil ürəyin açarıdır.
• Dil yanılar, doğrusunu deyər.
• Dil yarası qılınc yarasından yamandır.
• Dinəndə pis olur, dinməyəndə dərd kəsir.
• Doğru danışanın papağı yirtıq olar.
• Doğru elə bilər ki, hamı doğrudur.
• Doğru yalanı qovar.
• Doğruya zaval yoxdur, çəksələr min divana.
• Doğruluqla dost qapısın dolan gəl öz evin kimi.
• Doğru söz acı olar.
• Doğru sözdən xəta gəlməz.
• Doğru söz dəmiri dələr.
• Düzlük xoşbəxtliyin açarıdır.
• Düzlük uzanar, qırılmaz.
• Düz sözə boynum qıldan nazikdir.
• Əvvəl danış, sonra gül.
• Əvvəl düşün, sonra danış.
• İnsan ölər, söz qalar.
• Yağmasan da gurulda.
• Yalan ayaq tutar, yeriməz.
• Yalan danışan hamını qanmaz bilər.
• Yaman dil başa bəladır.
• Yalan ilə dünyanı gəzmək olar, qayıtmaq olmaz.
• Yaman yeyənin olsun, yaman deyənin olmasın.
• Yalan ki var, doğrunun quludur.
• Yalan söz üz qızardar.
• Yalançını mənzilənədək qov!
• Yalançının evinə od düşdü, heç kəs inanmadı.
• Yalançının üzü qara olar.
• Yalançının hafizəsi olmaz.
• Yalançı tamahkarı aldadar.
• Kələk ilə gələn, külək ilə gedər.
• Kişinin sözü bir olar.
• Nə dil bilsin, nə dodaq.
• Sözü söz kəsər.
• Söz bir olsa, dağ oynayar yerindən.
• Söz var el içində, söz var ev içində.
• Söz vaxtına çəkər.
• Söz verər, bez verməz.
• Söz qılıncdan kəsərlidir.
• Söz danışıqdan keçər.
• Sözdən söz götürür.
• Sözdən söz çıxar.
• Söz doğar.
• Söz insanın vuran əlidir.
• Söz ki var, dəmirdir, vurduqca uzanar.
• Söz götürənin, yer oturanındır.
• Sözlə plov olmaz, yağ ilə düyü gərək.
• Sözü məqamında deyərlər.
• Söz odur ki, haqqa vara.
• Söz sözün dayağıdır.
• Söz sözü çəkər, arşın bezi.
• Sözü ağzında bişir, sonra çıxart.
• Sözü asta, ürəyi tasvasda.
• Sözü at, yiyəsi götürər.
• Sözü yaxşı anla,
  Sonra qızıb banla.
• Sözün başı axırından bilinər.
• Sözün damarı olar, çəkdikcə uzanar.
• Sözün də qanadı var.
• Sözün doğrusun de, min atını çap.
• Sözün doğrusunu zarafatla deyərlər.
• Sözün zahiri zərif, batini lətif olmalıdır.
• Sözün ilə işin bir olsun.
• Sözün yalanı olmaz, yanlışı olar.
• Sözün yaxşısı baldan şirin olar.
• Sözünü bilməyənə aşağı başda da yer yoxdur
• Sən işi başlamağa çalış, iş özü qurtaracaq.💪🏻
• Söz həyatın bəzəyidir.
• Söz çeynəyən çox, söz deyən az.
• Söyləyəndən dinləyən arif gərək.
• Söyləyən olma, dinləyən ol.
• Söhbət ki var, bulaqdır, kəsilməsə axacaq.
• Hərzəkar ağız başa yumruq vurdurar.
• Çox bilirsən, az danış.
• Çox bilib az danışmaq igidin ləngəridir.
• Çox bilən quş, dimdiyindən cələyə düşər.
• Şirin dil ilanı yuvadan çıxardar.